Министерот за спорт Борко Ристовски заедно со пратеникот Ѓорѓија Сајкоски и со заменик министерот за јавна администрација, Лазе Јакимоски, денеска во Кичево свечено го пуштија во употреба современиот мултифункционален спортски комплекс.
Министерството за спорт инвестираше 6.960.000 денари во реконструкцијата на овој спортски коплекс во рамките на програмата за обнова на спортската инфраструктура.
-Со секоја ваква инвестиција го исполнуваме нашето ветување да ја обновиме спортската инфраструктура таму каде што беше запоставена. Упатувам порака до сите граѓани на Кичево да го користат, но и да го чуваат овој спортски комплекс кој не е само простор за тренинг туку и место за дружење, забава, здрава енергија и заедништво - порача Ристовски.
На местото на запуштените терени кај поранешиот Дом на АРМ, Кичево доби нов современ спортски комплекс кој опфаќа: терен за фудбал и ракомет со полипропиленски под (ПП) и со 30-метарска трибина, одбојкарско игралиште со ПП под, кошаркарско игралиште со подлога по најсовремени стандарди и фитнес зона опремена со реквизити.
Овој спортски центар во центарот на градот, граѓаните на Кичево ќе може да го користат за спорт и рекреација и на нив останува да го чуваат и да не дозволат да се оштетуваат терените и реквизитите со несовесно користење.
