Со свечената церемонија што се одржа во спортскиот центар „Јане Сандански“ во Скопје, официјално беше означен почетокот на Европскиот младински олимписки фестивал - ЕМОФ Скопје 2025.
Фестивалот го отвори претседателката на Република Македонија, Гордана Сиљановска Давкова, а поздравно обраќање до присутните имаше претседателот на Европскиот олимписки комитет, Спирос Капралос.
Спортско културниот спектакл ќе трае од 20 до 26 јули, и ќе ги обедини младите спортисти од цела Европа во духот на фер-плеј, пријателство и солидарност. ЕМОФ Скопје 2025 се одржува во организација на Македонскиот олимписки комитет, со поддршка од Министерството за спорт.
-Македонија верува во младите, гради спортска иднина и отвора врати за нови олимписки надежи. Европскиот олимписки младински фестивал е симбол на младинска енергија, олимписки дух и европско пријателство. Горди сме што во оваа голема европска спортска приказна Македонија ќе биде претставена со 181 млади спортисти што ќе настапат во сите спортови на фестивалот! Министерството за спорт го поддржа овој голем спортски настан кој го промовира спортот и ја промовира нашата држава. Верувам дека ќе бидеме добри домаќини и дека токму овде во Македонија ќе блеснат новите олимписки ѕвезди - порача министерот за спорт, Борко Ристовски.
ЕМОФ Скопје 2025 ќе обедини 4300 спортисти од 49 европски земји како и ЕОК тимот на бегалци. Фестивалот опфаќа и учество на 700 официјални лица и 800 волонтери, што го прави еден од најмасовните спортски настани досега организирани во Македонија. Најдобрите млади европски спортисти ќе се натпреваруваат во 15 спортски дисциплини - атлетика, пливање, џудо, велосипедизам, планински велосипедизам, гимнастика, стрелаштво, пинг-понг, теквондо, бадминтон, ракомет, кошарка, баскет 3x3 и одбојка.
Македонската спортска делегација брои 203 члена, од кои 181 се млади спортисти, кои ќе се натпреваруваат во сите дисциплини вклучени во програмата на фестивалот, што претставува историски момент за македонскиот спорт.
Натпреварите ќе се одвиваат на повеќе локации во Скопје и Куманово, а гимнастиката ќе се одржи во Градскиот спортски центар во Осиек, Хрватска.
Министерството за спорт ги повикува сите граѓани да ги поддржат младите спортисти, да присуствуваат на натпреварите и да бидат дел од овој историски спортски момент за Македонија.