Редот и законот мора да бидат пред сѐ и над секого, истакна министерот за спорт Борко Ристовски најавувајќи казни за екипите на ЖРК Скопје и ЖРК Гевгелија кои предизвикаа скандал во групната фаза од ракометниот Куп на Македонија.
Во вчерашното гостување во Дневникот на ТВ Сител, Ристовски најави дека на двата ракометни клуба кои ги прекршија спортските правила на игра, ќе им биде одземено правото за вршење дејност спорт.
-На двата клуба кои што го направија тоа, уште во понеделник ќе им биде одземено правото за вршење дејност спорт и веќе не ќе можат да се натпреваруваат во македонскиот шампионат во женска конкуренција. Ќе направиме итен состанок и со Ракометната федерација на Македонија за еднаш засекогаш да го ставиме под контрола ваковиот тип на немили настани и грубо кршење на спортските правила на игра. Државата, јавниот интерес, редот и законот мора да бидат пред сѐ и над секого – рече Ристовски.
Двата ракометни клуба кои настапуваат во единствената женска ракометна Супер лига, во завршницата од полуфиналниот натпревар од групната фаза во Купот на Македонија постигнуваа автоголови и покажаа изразена тенденција да го загубат натпреварот кој на крај заврши со резултат 17-16 за ЖРК Гевгелија.