Европскиот младински олимписки фестива ЕМОФ Скопје 2025 за нас како земја е едно големо искуство и голема придобивка за македонскиот спорт, истакна министерот за спорт, Борко Ристовски на денешната прес конференција на која присуствуваа претседателот на Европскиот олимписки комитет (ЕОК), Спирос Капралос и претседателот на Македонскиот олимписки комитет (МОК), Даниел Димевски, како организатори на овој голем спортски настан што се одржува во Македонија од 20 до 26 јуни.
Ристовски нагласи дека овој собир на кој учестуваат над 4.000 млади спортисти од 49 земји во Европа и на кој Македонија како домаќин е застапена со 181 натпреварувач во сите 15 дисциплини, е исклучително важен спортски настан кој значи промоција на Македонија во светот, но и промоција на вистинските спортски вредности меѓу младата популација.
-Она за што се залагам и јас како министер за спорт е да инспирираме што повеќе млади деца да спортуваат. Оваа голема спортска манифестација е вистински празник за очи бидејќи на едно место, тука во Македонија имаме толку многу млади спортисти од цела Европа. Од овој настан ќе имаме голем бенефит и како држава и како спортска нација. Не се случува секој ден над 4.000 млади спортисти да се натпреваруваат овде во нашата држава и да имаме најбројна наша македонска делегација како домаќини на овој настан. Се надевам дека од нив ќе излезат идни олимпијци кои еден ден со изборени норми ќе настапат и ќе се натпреваруваат на Олимписки игри – рече Ристовски.
И за нас како држава, и за Македонскиот олимписки комитет и за Министерството за спорт е важно да покажеме дека може да организираме големи натпреварувања, посочи министерот за спорт упатувајќи поддршка и поттик за националните спортски федерации да аплицираат за организација и на други натпреварувања од европски и од светски ранг.
-Ние како Министерство за спорт секогаш ќе стоиме и ќе ги помагаме таквите настани, затоа што тоа е најголема промоција на спортот и на државата. И секогаш ќе настојуваме преку спортот да промовираме вистински вредности кои се особено важни за младите спортисти – порача Ристовски.
Министерството за спорт освен логистичка ќе обезбеди и финансиска поддршка за организацијата на вакви големи спортски натпреварувања како што е актуелниот настан ЕМОВ Скопје 2025.
-Како Министерство и како држава си земаме обврска да го поделиме најтешкиот дел, а тоа е финансиската поддршка за организација на големи спортски натпреварувања. Организацијата на вакви големи натпреварувања од ранг на европски и светски првенства има големи финансиски побарувања и вообичаено тоа е најголемиот проблем. Веќе имаме разговори со боречката и со ракометната федерација кои со уште неколку земји од регионот поднесоа барања за организација на големи натпреварувања. Ние како држава и како Министерство за спорт стоиме на располагање да помогнеме во секој дел каде што е потребно, за да ја добиеме организацијата на тие и на други спортски натпреварувања од највисок ранг – рече Ристовски одговарајќи на новинарско прашање.