Идејата и заложбата за обединување на регионот преку спортот добива конкретна реализација. На иницијатива на македонското Министерството за спорт поддржана од сродните министерства во Србија и во Црна Гора со кои имаме воспоставено билатерална соработка, од 28 до 30 август во Спортскиот центар „Борис Трајковски“ во Скопје ќе се одржи првото издание на Регионалниот ракометен турнир.
Овој спортски настан е пилот-проект кој има за цел да ја трасира патеката за основање на Регионална ракометна лига што ќе ги обедини водечките клубови од регионот. Турнирот се одржува со поддршка од Министерството за спорт, во организација на Ракометната федерација на Македонија (РФМ).
Во првото издание на Регионалниот турнир ќе настапат по четири екипи во машка и женска конкуренција од Македонија, Србија и Црна Гора.
Во машка конкуренција ќе настапат македонскиот шампион РК Еурофарм Пелистер и вицешамионот РК Вардар 1961, РК Војводина од Србија и РК Ловќен од Црна Гора.
Во женска конкуренција, Македонија исто така ќе ја претставуваат двете водечки екипи – ЖРК Ѓорче Петров и ЖРК Металург Автокоманда, од Црна Гора доаѓа шампионот ЖРК Будуќност, а од Србија ЖРК Бор.
Во текот на трите натпреварувачки дена ќе се одиграат по четири натпревари. За сите натпревари влезот во СЦ „Борис Трајковски“ ќе биде слободен, а публиката ќе има можност да ужива во квалитетен ракомет непосредно пред стартот на новата натпреварувачка сезона во националните првенства и во европските купови.
Овој уникатен спортски настан има за цел да го промовира ракометот како спорт број еден во Македонија, но и да ја поттикне регионалната соработка во спортот.