Во Спортскиот центар „Борис Трајковски“ во Скопје синоќа беше означен почетокот на првиот Регионален ракометен турнир „Скопје 2025“, спортски настан инициран како резултат на соработката на ресорните министерства за спорт на Македонија, Србија и на Црна Гора.
Првото издание на турнирот на кој настапуваат водечки екипи од трите земји во двете конкуренции, се одржува во организација на Ракометната федерација на Македонија (РФМ) со поддршка од Министерството за спорт.
-Ми претставува огромно задоволство што една заедничка идеја за само неколку месеци успеавме да ја претвориме во конкретна работа. Заедно со моите колеги, министерот за спорт на Република Србија и со министерот за спорт и млади на Црна Гора, покажавме дека можеме да организареме еден ваков турнир кој сигурен сум дека ќе прерасне во традиција. Преку ова испраќаме и порака дека заедно, со здружени сили можеме да направиме многу повеќе за спортот од она што го имаме сега на овие простори – истакна министерот Борко Ристовски на отворањето на турнирот.
Во поздравниот говор до учесниците на турнирот, министерот за спорт на Република Србија, Драган Гајиќ ја истакна добрата соработка што е воспоставена меѓу ресорните министерства на трите земји и за во иднина најави воспоставување и на регионална лига.
-Ние тројцата министри за спорт на Македонија, Црна Гора и Србија, мечтаевме да ве видиме вака сите заедно на спортскиот терен и го дочекавме овој ден. Од срце ви посакувам да одиграте добри натпревари, никој да не се повреди, да се подготвите за вашите лиги. Во иднина повторно да се видиме сите заедно и во некоја регионална лига, да ги полниме салите и репрезентациите на нашите земји да играат во четвртфиналиња, во полуфиналиња и да освојуваат медали на европски, на светски првенства и на олимписки игри. Сигурен сум дека, како и секогаш со години и со децении наназад, пријателството и дружењето ќе победи и во овие три дена во Скопје. Борко, ти благодарам што го организираше сето ова. Навистина се чувствува голема позитивна енергија – рече Гајиќ во своето обраќање.
Како домаќин и технички организатор на турнирот, претседателот на РФМ, Александар Стефанов, им посака добредојде на сите учесници и истакна дека претставува големо задоволство Македонија да биде дел од ваков значаен настан.
На првото издание на Регионалниот ракометен турнир „Скопје 2025“ учествуваат по четири екипи во машка и во женска конкуренција. Во машка конкуренција настапуваат: РК Еурофарм Пелистер и РК Вардар (Македонија), РК Војводина (Србија) и РК Ловќен (Црна Гора). Во женска конкуренција : ЖРК Ѓорче Петров и ЖРК Металург Автокоманда (Македонија), ЖРК Будуќност (Црна Гора) и ЖРК Бор (Србија).
Сите натпревари во трите натпреварувачки дена (28-30 август) се играат во СЦ „Борис Трајковски“. Влезот е слободен за сите љубители на ракометот.
